Premye minis Alexis anonse mobilizasyon san limit kont machann dwòg yo

Guy Philippe toujou nan mawon ; 3 mesye ki gen akizasyon dilè dwòg sou do yo transfere nan prizon Ozetazini
mercredi 18 juillet 2007,
Radio Kiskeya
Premye minis ayisyen an, Jacques-Edouard Alexis, deklare mèkredi nan vil Jakmèl (Sidès) Ayiti ak patnè l yo antre nan yon kanpay entènasyonal kont machann dwòg yo ki p ap kanpe nan wout.
"Kèlkilanswa moun ki nan dwòg la, nan kèlkeswa kan li ye a, nou ap atake l", se konsa chèf gouvèlman an pale nan moman li t ap reponn kesyon yon gwoup jounalis sou operasyon ajans kont dwòg Etazini an ak biwo kont trafik dwòg Ayiti a (BLTS) te mennen lendi pou eseye arete ansyen kandida alaprezidans Guy Philippe, lakay li nan Bèjo, toupre vil Okay (a yon distans 196 kilomèt nan sid Pòtoprens).
Mesye Alexis presize PNH te bò kote DEA pandan desann delye sa a alòske, sou bò pa l, pòtpawòl Polis Nasyonal la, komisè Frantz Lerebours, pat kapab bay ankenn enfòmasyon sou sa lè laprès t ap pozel kesyon mèkredi.
Premye minis la ajoute, jan Prezidan Préval te di l la, Ayiti pa gen fòs pou l antre nan batay kont flewo dwòg la pou kont li. Se tou nòmal pou l chache bourad nan men Etazini paske yon pote kole nesesè ant peyi ki pwodui, peyi ki achte ak peyi ki ride transpòte dwòg yo.
Jiskaprezan, pèsonn pa gen nouvèl Guy Philippe, ansyen chèf rebèl ki te pran lèzam kont Jean-Bertrand Aristide yo an 2004, ansyen militè ak komisè polis epi alatèt Fwon rekonstriksyon nasyonal (FRN).
Pandan operasyon ap dewoule sou teren an, DEA transpòte depi madi nan prizon Miyami 3 moun ki gen akizasyon machann dwòg sou do yo. Se ansyen lyetnan Lame Dayiti, Raynald Saint-Pierre, lapolis te arete depi 11 novanm 2006 ; biznismann Lavaud François, pwopriyetè antrepriz Chachou yo, BLTS ak DEA te fouke lendi nan Gonayiv (a yon distans 171 kilomèt nan nò kapital la) ak Bernard Piquion alyas "Fizi Bwa". PNH te arete l 31 me ansanm ak yon dizèn lòt dilè ladan yo 3 polis ak 2 kolonbyen ki t ap transpòte nan machin yo 420 kilo kokayin ki vo plis pase 8 milyonn dola youwès. spp/RK

Premye minis kanadyen an ap ann Ayiti vandredi

Ranfòsman relasyon Pòtoprens ak Ottawa, se objektif vizit Stephen Harper la
jeudi 19 juillet 2007,
Radio Kiskeya
Premye minis kanadyen an Stephen Harper ap rive Pòtoprens vandredi pou yon vizit ofisyèl kèk èdtan ki gen kòm objektif ranfòse relasyon Kanada ak Ayiti epi egzaminen sa ki reyalize deja kòm travay pandan dènye ane sa yo.
Dapre biwo kominikasyon Palè Nasyonal la, se Premye minis Jacques-Edouard Alexis ki pral resevwa mesye Harper nan ayopò entènasyonal Toussaint Louverture. Apre sa, chèf gouvèlman konsèvatè kanadyen an ap rann li nan Palè Nasyonal pou l al chita pale ak Prezidan René Préval.
Anvan li debake, Stephen Harper pale anpil jounen jedi a de sitiyasyon difisil Ayiti ak bourad li merite pandan yon vizit nan zile Barbade kote li rankontre Premye minis Owen Arthur.
Harper ap gen avèk li nan Pòtoprens, dènye etap vwayaj li a, yon gwo gwoup jounalis dapre anbasadè kanadyen an, Claude Boucher, ki kwè se ap yon okazyon pou yon pi bèl imaj Ayiti ale aletranje.
Vire won chèf gouvèlman kanadyen an nan rejyon an te kòmanse an Kolonbi anvan li te rapousuiv o Chili. spp/RK
http://www.radiokiskeya.com/spip.php?article3876